ចំការទុរេន អ៊ីធី │ ស្ទឹងត្រង់ កំពង់ចាម

ចំការទុរេន មើលពីលើ

ខេត្តកំពង់ចាម សម្បូរដោយភោគផលដំណាំចម្រុះជាច្រើនប្រភេទ ក្នុងនោះដំណាំហូបផ្លែដែលល្បីល្បាញ ទូទាំងប្រទេស គឺផ្លែទុរេនបែកអន្លូង ដែលមានការដាំដុះជាច្រើនមិនថាក្នុងភូមិបែកអន្លូងនោះទេ ។ ជាពិសេសគឺភូមិៗជុំវិញ បានបន្តពង្រីកផ្ទៃដីដាំដុះបន្ថែម ។

ចំការទុរេន អ៊ីធី មើលពីចំងាយ

ចំការទុរេន អ៊ីធី ជាចំការមួយស្ថិតក្នុងភូមិគីឡូ១០ ឃុំអារក្សត្នោត ស្រុកស្ទឹងត្រង់ ខេត្តកំពង់ចាម មានចម្ងាយប្រមាណ ២០.៥ គ.ម ពីសាលាស្រុកស្ទឹងត្រង់ និងចម្ងាយប្រមាណ ៥៣ គ.ម ពីសាលាខេត្តកំពង់ចាម ។

ដើម្បីទៅកាន់ចំការទុរេន អ៊ីធី អ្នកអាចធ្វើដំណើរតាមបណ្តោយផ្លូវមាត់ទន្លេទិសដៅ ទៅខាងជើងក្រុងកំពង់ចាម សំដៅទៅស្រុកស្ទឹងត្រង់ និងបន្តដំណើររហូតដល់ចំការទុរេន អ៊ីធី តែម្តង ដោយឆ្លងកាត់បឹងកេត (ចំការចេកអំបូងលឿង) ។

ពូខន អ៊ីធី ម្ចាស់ចំការ

ពេលទៅដល់ចំការ អ្នកនឹងបានឃើញផ្ទះចំការរបស់ពូមីងម្ចាស់ចំការ ។ ក្នុងចំការមានដាំដំណាំជាច្រើនទៀត ក្រៅពីដើមទុរេន មានដូចជា មង្ឃុត ភ្ញៀវ ... ។ ក្រៅពីនោះ នៅមានស្រះចិញ្ចឹមត្រី ដែលអាចអោយយើងស្ទូចត្រីលេងកម្សាន្តផងដែរ ។

ទិដ្ឋភាពពីខាងលើ ចំការទុរេន អ៊ីធី

ចំការទុរេន អ៊ីធី មិនសូវជាធំប៉ុន្មានទេ អ្នកអាចដើរលេងកម្សាន្តបានសព្វ និងអាចមើលសកម្មភាពកាត់ទុរេន ចាប់ទុរេន និងការដឹកទុរេនយកមកទុក ។ ការប្រមូលផលទុរេន អាចធ្វើបាននៅពេលមេឃរាំង មិនមានភ្លៀង ទើបមិនប៉ះពាល់ដល់គុណភាពទុរេន ។