ជ្រោយ​ Vành


រម​ណីយ​ដ្ឋាន​ជ្រោយ​ Vành ស្ថិត​នៅ​ប៉ែក​ខាង​កើតក្រុង​ Thái Bình ក្នុង​ឃុំ Nam Phú ស្រុក Tiền Hải ខេត្ត​ Thái Bình ចំងាយ​ពី​​ក្រុង​ Thái Bình ប្រមាណ ៤៥​ គីឡូម៉ែត្រ និង​ ពី​ទី​រួម​ស្រុក Tiền Hải ប្រមាណ​ ២៥​ គីឡូម៉ែត្រ ។ 

បើ​យើង​ធ្វើ​ដំណើរ​តាម​រថយន្ត ​មាន​សភាព​ពិបាក​បន្តិ​ច​ដោយ​សារ​ផ្លូវ​ធ្វើ​ដំណើរ​មាន​លក្ខណៈ​តូច ពិ​បាក​ក្នុង​ការ​ជៀស​គ្នា ។ ការ​ធ្វើ​ដំណើរ​ពី​ក្រុង Thái Bình ចំណាយ​ពេល​ប្រមាណ​១​ម៉ោង ។ 

រមណីយ​ដ្ឋាន​ជ្រោយ Vành នេះ​កើត​ឡើង​ដោយសារ ការ​ហូរ​ភក់​ល្បាប់​និង​ខ្សាច់​ពី​ទន្លេ Hồng បង្កើត​ជា​ជ្រោយ​មាន​ផ្ទៃ​រាប​ស្មើ​នៅ​ជាប់​នឹង​សមុទ្រ ។ វា​គ្រប់​ដណ្តប់​លើ​ផ្ទៃ​ប្រមាណ​ជា ១.៦៩៦ ហិចតា ដែល​មាន​ឆ្នេរ​សមុទ្រ​ប្រវែង ៦​គីឡូម៉ែត្រ អម​ដោយ​ព្រៃ​លិច​ទឹក​សមុទ្រ ៧០០​ហិចតា ។ 


ទឹក​សមុទ្រ​នៅ​ជ្រោយ​ Vành មាន​ពណ៌​ខ្មៅ​បន្តិច​ បើ​ប្រៀប​ធៀប​ទៅ​នឹង​សមុទ្រ​នៅ​ប្រទេស​កម្ពុជា​យើង ។ អ្នក​កម្សាន្ត​ភាគ​ច្រើន​មក​លេង​ជ្រោយ Vành នៅ​ថ្ងៃ​ឈប់​សម្រាក​ រឺ​ថ្ងៃ​ចុងសប្តាហ៍​ នា​រដូវ​ក្តៅ ដោយ​ហេតុ​ថា​នៅ​រដូវ​ត្រជាក់​ប្រទេស​វៀតណាម​អាកាស​ធាតុ​ត្រជាក់​ខ្លាំង ហើយ​បើ​អ្នក​ចង់​ទៅ​លេង​ពេល​មនុស្ស​ច្រើន​នោះ គឺ​ថ្ងៃទី ៣០មេសា និង​១ឧសភា ពេល​នោះ​ប្រជាជន​វៀតណាម​ទាំង​អស់​ត្រូវ​បាន​ឈប់​សម្រាក ។ 


នៅ​រមណីយដ្ឋាន​ជ្រោយ Vành នេះ​មាន​សេវាកម្ម​ផ្ទះ​សំណាក់ អាហារដ្ឋាន បម្រើ​សេវា​លើ​ការ​ស្នាក់​នៅ ម្ហូប​អាហារ​បែប​សមុទ្រ និង​ការ​ច្រៀង​រាំ​ ដែល​មាន​តម្លៃ​ថោក​សមរម្យ ។ អ្នក​អាច​ទៅជា​ក្រុម ជាថ្នាក់​ រឺ​ជា​គូសង្សារ​បាន ។ ពេល​ចុះ​លេង​ទឹក​ អ្នក​អាច​ផ្ញើ​សំភារៈ​ នៅ​ខាង​លើ ដោយ​ផ្ញើ​ម្តង​ក្នុង​១ទូ អស់​ ១ម៉ឺនដុង រឺ​ក៏​យក​ទៅ​តាម​ខ្លួន​ ព្រោះ​នៅ​លើ​ឆ្នេរ​ក៏​មាន​ការ​លក់​ដូរ​ម្ហូប​អាហារ​ញ៉ាំផងដែរ ដូចជា Hot Dog ទឹក​ក្រូច​ ទឹក​ដូង នំ​កញ្ចប់ ។ ក្រោយ​ពី​លេង​ទឹក​រួច​ អ្នក​អាច​មក​ងូត​ទឹក​សាប​សំអាត​ខ្លួន នៅ​ខាង​លើ (កន្លែង​ផ្ញើ​ឥវ៉ាន់) ដែល​អស់​ម្នាក់ ១ម៉ឺនដុង​ទៀត (Free ថង់ច្រក​ខោ​អាវសើម) ។ 

ប្រសិន​អ្នក​ទៅ​ជា​ក្រុម​ អ្នក​អាច​ទំនាក់​ទំនង​ខាង​ផ្ទះ​សំណាក់ ហើយ​រៀប​ចំ​ការ​បោះ​តង់ ដុត​ភ្នក់​ភ្លើង​ ច្រៀង​រាំ​ លេង​ល្បែង​យ៉ាង​សប្បាយ​ក៏បាន ។ ពេល​ព្រឹក​អ្នក​អាច​ងើប​មើល និង​ថត​រូប​​ព្រះ​អាទិត្យ​រះ​ដ៏​ស្អាត ។ 


ជ្រោយ​ Vành គ្រាន់​តែ​ជាឆ្នេរ​សមុទ្រ​មួយ​ដែល​យើង​អាច​ទៅ​លេង​បាន​នៅ​ថ្ងៃ​ចុង​សប្តាហ៍​ក្រោយ​ពី​សម្រាក​ពីការងារ​ និង​ការសិក្សា ។ វា​នៅ​ជិត​ក្រុង​ Thái Bình ងាយ​ស្រួល​ធ្វើ​ដំណើរ​ដោយ​ម៉ូតូ តែ​ក៏​វាមិន​ទាន់​ជា​ឆ្នេ​រ​ស្អាត​ដូច​បណ្តា​ឆ្នេរ​មួយ​ចំនួន​នៅ​វៀតណាម​ប៉ែក​ខាងត្បូងដែរ ។

ប្រភព វីគីភីឌា
Previous
Next Post »
0 Komentar