​ដើម្បី​​ចៀសវាង​​ពី​​ជំងឺ ត្រូវ​​សម្រក​​ខ្លាញ់​​ក្បាល​ពោះ​


ដើម្បីជៀសវាង​ពីជំងឺ​ ត្រូវ​សម្រក​ខ្លាញ់​ក្បាល​ពោះ


   ជាតិ​ខ្លាញ់​នៅ​បរិវេណ​ក្បាលពោះ ជា​ខ្លាញ់​ដែល​នៅ​សេសសល់ បន្ទាប់​ពី​រាងកាយ​យក​ទៅ​ប្រើប្រាស់​មិន​អស់ ដោយ​ភាគច្រើន តែងតែ​សង្កេតឃើញថា ជាតិ​ខ្លាញ់​ប្រភេទ​នេះ ស្ថិតនៅ​ចន្លោះ​សរីរាង្គ​នានា​ក្នុង​រាង​កាយ ដូចជា ថ្លើម លំពែង ពោះវៀន និង​តម្រងនោម​ជាដើម​។ ជាតិ​ខ្លាញ់​នេះ មាន​លក្ខណៈ​ខុស​ប្លែក​ពី​ជាតិ​ខ្លាញ់​នៅ​បរិវេណ​ភ្លៅ និង​កំប៉េះគូទ ដែល​អាច​កម្ចាត់​បាន​ដោយ​ប្រើ​បច្ចេកវិទ្យា​ថ្មីៗ ប៉ុន្តែ​ខ្លាញ់​ក្បាលពោះ អាច​នាំឲ្យ​មាន​គ្រោះថ្នាក់​ចំពោះ​សុខភាព​...​។​

​-​គ្រោះថ្នាក់​បណ្តាលមកពី​ខ្លាញ់​ក្បាលពោះ​: ខ្លាញ់​ក្បាលពោះ មាន​ទំនាក់ទំនង​យ៉ាងខ្លាំង​នឹង​ជំងឺ​បេះដូង ជំងឺ​ទឹកនោម​ផ្អែម​ប្រភេទ​២ សម្ពាធ​ឈាម​ឡើង​ខ្ពស់ និង​ជំងឺ​មហារីក​មួយចំនួន​ទៀត​។​

​-​ធ្វើ​បែប​ណា​ទើប​ដឹងថា មាន​ខ្លាញ់​ក្បាលពោះ​លើស​ : វិធី​ងាយស្រួល​បំផុត គឺ​អ្នក​គ្រាន់តែ​វ៉ាស់​ទំហំ​ចង្កេះ លើស ៨៩ សង់ទីម៉ែត្រ និង​បុរស​មាន​ទំហំ​ចង្កេះ​លើស ១០២ សង់ទីម៉ែត្រ បង្ហាញថា អ្នក​មាន​ជាតិ​ខ្លាញ់​លើស​ត្រង់​បរិវេណ​ក្បាលពោះ​។​

​​-​បញ្ហា​ជាតិ​ខ្លាញ់​លើស​ចំពោះ​ស្ត្រី​: បន្ទាប់​ពី​អស់​រដូវ រាងកាយ​ស្ត្រី​មាន​ការផ្លាស់ប្តូរ​អ័រម៉ូន​យ៉ាងច្រើន ដែល​នេះ​អាច​ជា​កត្តា​មួយ​ដែល ធ្វើ​ឲ្យ​ឡើង​ទម្ងន់​។ ក្រៅពីនេះ តំណពូជ គឺជា​កត្តា​សំខាន់​មួយ ដែល​ធ្វើឲ្យប៉ះពាល់​ដល់ជា​តិខ្លាញ់ បូក​រួម​ទាំង​ការប្រើប្រាស់​ជីវិត​ប្រចាំថ្ងៃ​ផងដែរ​...​។

​​-​កត្តា​គួរ​ចងចាំ​: ចំណុច​ល្អ​គឺ នៅពេល​ដែល​អ្នក​ព្យាយាម​សម្រក​ទម្ងន់​នោះ ជាតិ​ខ្លាញ់​ក្បាលពោះ​នឹង​ស្រក​មុនគេ​។ ដូចនេះ ការ​ហាត់ប្រាណ​បែប​ធម្មតា អាច​ជួយ​ឲ្យ​សា​ច់ដុំដំណើរការ​បាន​យ៉ាង​ល្អ ហើយ​ថែមទាំង​អាច​សម្រក​ក្បាលពោះ​បាន​ថែម​ទៀត​។​

​​-​មុន​ពេល​ហាត់ប្រាណ អ្នក​គួរ​មាន​កត្តា​មួយចំនួន​ដូចជា​:


​​*​ការលើកទឹកចិត្ត​: ព្រោះ​កាល​ដែល​អ្នក​ព្យាយាម​ដោយ​គ្មាន​អ្នក​លើក​ទឹកចិត្ត អាច​នឹង​ធ្វើឲ្យ​អ្នក​បោះបង់​ពាក់កណ្តាល​ទីបាន​។​


*​កុំ​សម្រក​ទម្ងន់​ច្រើនពេក​: តាម​ការណែនាំ​ពី​អ្នកជំនាញ ឲ្យដឹងថា ការ​ហាត់ប្រាណ ដើម្បី​សម្រក​ទម្ងន់​បាន ០.៥-១ គីឡូក្រាម ក្នុង​មួយ​សប្តាហ៍ គឺជា​រឿង​ល្អ​មួយ​។​

​*​កំណត់​គោលដៅ​: អ្នក​គួរ​កំណត់​គោលដៅ​ឲ្យ​សុខភាព​ល្អ ជា​ចំណុច​នាំមុខគេ​។​

​*​កំណត់អត្រា​អាហារ​: អ្នក​គួរ​កត់ត្រា​ពីអ្វី​ដែល​អ្នក​ទទួល​ទាន និង​បរិមាណ​អាហារ​ប្រចាំ​ថ្ងៃ ដើម្បី​ឲ្យបាន​ដឹង​ពី​ទម្លាប់​របស់​អ្នក​។​

​*​ទទួលទាន​តិច តែ​ជា​អាហារ​សុខភាព​: ដូចជា​អាហារ​មាន​កាក​សសៃ​ច្រើន (​ធញ្ញជាតិ អង្ករ​សំរូប អង្ករ​អា​វ័ន ផ្លែឈើ បន្លែ​...) ព្រមទាំង​ជា​មួយ​អាហារ​គ្រប់​ទាំង ៥​ក្រុម​។ ម្យ៉ាងទៀត អ្នក​ត្រូវ​តម​អាហារ​ដែល​មាន​ជាតិ​ខ្លាញ់ ដូចជា សាច់​ជាប់​ខ្លាញ់ អាហារ​បំពង ឬ​ចៀន ឬ​ផលិតផល​នានា​ដែល​មាន​ជាតិ​ខ្លាញ់​។ ជាពិសេស គួរ​ទទួល​ទាន​ក្នុង​បរិមាណ​តិចតួច តែ​ល្អ​ចំពោះ​សុខភាព​។​

​*​ទទួលទាន​ភេសជ្ជៈ​ដែល​ល្អ​ចំពោះ​សុខភាព​: អ្នក​គួរ​ពិនិត្យ​លើ​ភេសជ្ជៈ​ដែល​អ្នក​ទទួល​ទាន​ជាពិសេស​បរិមាណ​ជាតិ​ស្ករ​។ ក្រៅពីនេះ ភេសជ្ជៈ​មួយចំនួនទៀត ដូចជា តែ កាហ្វេ ឬ​គ្រឿង​ស្រវឹង ជា​ភេសជ្ជៈ​ដែល​មិនល្អ​ចំពោះ​សុខភាព ព្រោះ​វា​ផ្តល់​កាឡូរី​យ៉ាងច្រើន​។ ដូចនេះ អ្នក​គួរ​ទទួល​ទាន​ទឹក​ធម្មតា ទើប​ជា​ការប្រសើរ​។​

​*​ធ្វើ​ចលនា​រាងកាយ​ឲ្យបាន​ច្រើន​: អ្នក​គួរ​ហាត់ប្រាណ​ឲ្យបាន ៣០​នាទី ឬ​យ៉ាងតិច ឲ្យបាន ៥​ថ្ងៃ ក្នុង​មួយ​សប្តាហ៍ ដោយ​ក្នុង​នោះ អ្នក​អាច​រត់ រាំ ហែល​ទឹក ឬ​ដើរ ដើម្បី​បញ្ចេញ​សកម្មភាព​រាងកាយ​។ តែ​ទោះជា​យ៉ាងនេះក្តី អ្នក​គួរ​ពិភាក្សា​ជាមួយ​គ្រូពេទ្យ​សិន មុន​នឹង​ហាត់ប្រាណ​បែប អ៊ែ​រ៉ូ​ប៊ិក (Aerobic) ព្រោះ​វា​ជា​វិធី​ហាត់ប្រាណ​មួយ​បែប ដែល​ត្រូវ​ការប្រើ​ថាមពល​ខ្លាំង​។ ម្យ៉ាងទៀត​ការទទួល​កម្លាំងចិត្ត ដើម្បី​ធ្វើឲ្យ​មាន​សុខភាព​ល្អ និង​ស្រក​ជាតិ​ខ្លាញ់​ក្បាលពោះ​បានល្អ​៕​
Previous
Next Post »
0 Komentar