ការ​ថែទាំ​ធ្មេញ​គួរ​ចាប់​ផ្ដើម ​ពេល​ទារក​ដុះ​ធ្មេញ​ដំបូង


 ឪពុកម្ដាយគួរ​យកចិត្ត​ទុកដាក់​លើ​សុខភាពមាត់ធ្មេញ​​ពេលទារក​ដុះធ្មេញ​ដំបូង​បង្អស់​​
   ការ​​សិក្សា​​ថ្មី​បាន​ណែនាំ​​ថា ឪពុក​ម្ដាយ​​គួរ​​តែ​ចាប់​​ផ្ដើម​​ថែ​ទាំ​​ធ្មេញ​​កូន​ៗ​របស់​ខ្លួន​នៅ​ពេល​​ដែល​​ពួក​គេ​ដុះ​ធ្មេញ​​ដំបូង​បង្អស់​។ ការ​ឆាប់​យក​ចិត្ត​ទុកដាក់​នឹង​សុខភាព​មាត់ធ្មេញ អាច​ធ្វើ​ឲ្យ​មនុស្ស​មាន​ធ្មេញ​រឹងមាំ​បាន​យូរ​អង្វែង​។
   យោង​តាម​​សមាគម​​ទន្តពេទ្យ​កុមារ​​ជាតិ របស់​អាមេរិក មាតា​បិតា​គួរ​​តែ​ចាប់​ផ្ដើម​ទម្លាប់​ដុស​ធ្មេញ​នៅ​ពេល​​ដែល​ទារក​ដុះ​ធ្មេញ​ដំបូង​បង្អស់​​​ម្ល៉េះ​ ។ ការ​​ដុស​​សម្អាត​ដោយ​ច្រាស​ជាមួយ​ទឹក​ត្រូវ​ធ្វើ​ឡើង​២​នាទី និង​២​ដង​ជា​រៀងរាល់​ថ្ងៃ​។
មាតាបិតា​ត្រូវ​បង្ហាត់​កូន​ឲ្យ​ចេះ​ប្រើ​ខ្សែ​សម្អាត​ចន្លោះ​ធ្មេញ ដើម្បី​ឲ្យ​ពួកគេ​ប្រកាន់​ខ្ជាប់​នូវ​ទម្លាប់​នោះ​ដល់​ធំ​។
ទារក​មិន​គួរ​ជញ្ជក់​ក្បាល​ដោះ ឬ​ម្រាម​ដៃ​យូរ​ពេក​ទេ ព្រោះ​វា​អាច​បណ្ដាល​ឲ្យ​ធ្មេញ​ដុះ​មិន​ត្រង់​ជួរ​។
ឪពុកម្ដាយ​មិន​គួរ​បណ្ដោយ​ឲ្យ​កូន​គេង​លង់​លក់​ជាមួយ​នឹង​ដប​ទឹកដោះគោ ឬ​ក៏​ទឹកផ្លែឈើ​នោះ​ទេ ព្រោះ​ជាតិ​ផ្អែម​នៅក្នុង​អាហារ​ទាំងនោះ​អាច​បណ្ដាល​ឲ្យ​ធ្មេញ​របស់​កុមារ​ឆាប់​ពុក និង​នាំឲ្យ​មាន​អាការ​ឈឺធ្មេញ​ជាដើម​។
ឪពុកម្ដាយ​ត្រូវ​ជំរុញ​ឲ្យ​កូន​ញ៉ាំ​ទឹក​ក្រោយ​ពី​បៅ​ទឹកដោះគោ ឬ​ក៏​ញ៉ាំ​បបរ ដើម្បី​លាង​ជម្រះ​សារធាតុ​ឬ​កម្ទេចកម្ទី​នានា​នៅ​ជាប់​ធ្មេញ​។
ការ​ទទួលទាន​ទឹក​ដែល​ត្រូវ​បាន​សម្អាត​ដោយ​សារធាតុ​ហ្វ្លរីត ត្រូវ​បាន​គេ​ទទួល​ស្គាល់​ថា មាន​គុណប្រយោជន៍​ដល់​សុខភាព​ធ្មេញ៕
អត្ថបទ Post Khmer
Previous
Next Post »
0 Komentar